ព្រួញមួយបាញ់បានសត្វពីរ
July 17, 2006
ព្រួញមួយបាញ់បានសត្វពីរ បានន័យថា ក្នុងពេលតែមួយប្រើមធ្យោបាយតែមួយ អាចផ្ដូលសត្រូវឲ្យបរាជ័យចាប់ពីពីរនាក់ឡើងទៅ ឬក៏អាចទទួលផលប្រយោជន័ចាប់ពីពីរឡើងទៅ ។
ការប្រើប្រាស់ល្បិចកលនេះ មិនធម្មតាទេ ហើយក៏មិនងាយស្រួលដែរព្រោះថា ល្បិចនេះគឺយើងត្រូវប្រឈមមុខនិងគូរសត្រូវជាច្រើននាក់ ឲ្យតែខ្វះការប្រុងប្រយ័ត្ន ឬធ្វេសប្រហេសតែបន្តិចពិតជាត្រូវជួបគ្រោះអាសន្នធំ ហើយហេតុនេះ មុននិងក្រោយនៃកិច្ចការ ត្រូវតែព្យាយាមរង់ចាំឲ្យបាននូវបរិយាកាសនិងពេលវេលាដែលសមស្រប ។
គោលគំនិតនិងសកម្មភាបរបស់មនុស្សដែលបែកឆ្វេង មានច្រើនសន្ធឹកសន្ធាប់ណាស់គឺព្រោះតែផលប្រយោជន៍និងកេរ្តិ៍ឈ្មោះប៉ុណ្ណោះ ។ ហេតុតែត្រូវការកេរ្តិ៍ឈ្មោះ គ្រប់គ្នាត្រូវតែខំប្រឹងដណ្ដើម ចង់បានផលប្រយោជន៍គ្រប់គ្នាត្រូវតែប្រជែង ធំដណ្ដើមតាមធំ តូចដណ្ដើមតាមតូច លទ្ធផលនៃការដណ្ដើមនៃការប្រជែងពិតហើយត្រូវតែមានអ្នកឈ្នះនិងអ្នកចាញ់ អ្នកឈ្នះពិតជាសប្បាយហើយមុខខ្លាញ់ អ្នកចាញ់នឹងក្រៀមក្រំហើយសើចសេះ ឬក៏ត្រូវរងគ្រោះរបួសទាំងសងខាង ។
ពេលអនុវត្តល្បិចនេះ ត្រូវផ្អែកលើគោលការណ៍ដូចនេះ ត្រូវស៊ើបឲ្យដឹងនូវស្ថានភាព ចិត្តគំនិត លក្ខណ្ឌនៃជីវភាព បរិយាកាសជុំវិញរបស់គូបដិបក្ខឲ្យបានច្បាស់លាស់ ធ្វើការប្រៀបផ្ទឹមចំណុចដូចគ្នា បើគូបដិបក្ខជាមនុស្សដែលស្រឡាញ់កេរ្តិ៍ឈ្មោះ គួរតែផ្ដល់ការសរសើរឲ្យបានច្រើន តែបើជាមនុស្សលោភលន់ ទ្រព្យសម្បត្តិ ផលប្រយោជន៍ គួរធ្វើចិត្តឲ្យទូលាយតែបើសិនជាគូបដិបក្ខត្រូវការទាំង កេរ្តិ៍ឈ្មោះ ចង់បានទាំង ផលប្រយោជន៍ ក្រៅពីការសរសើរនិងធ្វើចិត្តឲ្យទូលាយ ជៀសមិនផុតពីបញ្ចុះពេជ្របន្ថែមលើជញ្ជៀនដែលពាក់នោះឡើយ ។
នេះហើយដែលហៅថា ធ្វើតាមចិត្តឲ្យតាមចង់ គោលបំណងគឺឲ្យគូបដិបក្ខកើតការសង្ស័យ តែបើទោះជាមានការសង្ស័យ ក៏មិនដល់ថ្នាក់ពាក់មុខយក្សដាក់គ្នាភ្លាមៗដែរ ធ្វើបែបនេះគេហៅថា ការចៀនត្រីឲ្យឆ្អិនតាមសម្រួល រង់ចាំដល់ពេលវេលាដែលសមស្របនិងទុំជោរហើយ បញ្ចេញស្នៀតពិសពុល រកលេសបង្កើតបញ្ហា អុជអាលឲ្យភាគីទាំងប៉ុន្មានឲ្យកើតការក្ដៅក្រហាយដាក់គ្នា រុញឲ្យប្រយុទ្ធយកស្លាប់រស់តែម្ដង ពេលនោះ យើងអាចអង្គុយគងអន្ទាក់ខ្លា មើលខ្លាខាំគ្នា រង់ចាំរើសយកឆ្អឹងព្រលាត់យកស្បែកខ្លាដោយត្រជាក់ចិត្ត ។
មនុស្សដែលឆ្លាតបំផុត ក្រោយសម្លាប់មនុស្សហើយអាចឲ្យក្បាលដែលធ្លាក់ទៅដីចេះស្រែកថា អគុណ ចំពោះខ្លួនទៀតផង ។
